నవగ్రహహోమ నిరూపణము

లక్ష్మిని కోరువాడును, శాంతికాముడును, వృష్టి, ఆయుర్దాయ, పుష్టులు కోరువాడును లేదా అభిచార ప్రక్రియ ప్రారంభించనున్నవాడును గ్రహపూజ ప్రారంభించవలెను. సూర్యుడు, చంద్రుడు, కుజుడు, బుధుడు, బృహస్పతి, శుక్రుడు, శని, రాహువు, కేతువు అని గ్రహములు. ఈ గ్రహముల మూర్తులను క్రమముగ రాగి, స్పటికము, రక్త చందనము, స్వర్ణము (బుధ గురువులు), రజతము, ఇనుము, సీసము (రాహు కేతువులు)-వీటితో నిర్మించవలెను. లేదా ఆయా గ్రహముల రంగులతో వ్రాసిగాని, గంధ మండలముల పైగాని పూజించవలెను. వారివారి రంగులను అనుసరించి వస్త్రములు, పుష్పములు, గంధములు, బలులు ఇవ్వవలెను. గుగ్గులు ధూపము ఈయవలెను. ప్రతి గ్రహమునకును మంత్ర పూతములైన చరువులు ఇవ్వవలెను. ఈ గ్రహములకు వరుసగా ‘ఆకృష్ణాన.....’, ‘ఇమం దేవా.......’ ‘అగ్నిర్మూర్ధా దివః కకుత్.......’ ‘ఉద్బుధ్యస్వ.......’ ‘బృహస్పతే అతి యదర్యః........’ ‘అన్నాత్పరిస్రుతః......’, ‘శన్నో దేవీః......’, ‘కేతుం కృణ్వన్ని మాన్.....’ అను మంత్రములు వినియోగించవలెను. ఈ గ్రహములకు క్రమముగ-అర్కము, పలాశ, ఖదిర, అపామార్గ, పిప్పల ఉదుంబర, శమీ, దూర్వా, కుశలు సమిధలు. ఒక్కొక్క గ్రహమునకు ఈ సమిధలు నూట ఎనిమిదిగాని, నూట ఇరువది గాని, మధు, ఆజ్య, దధులతో హోమము చేయవలెను. ఈ గ్రహములను ఉద్దేశించి బ్రాహ్మణులకు భోజనమునందు వరుసగా బెల్లముతో వండిన అన్నము, పాయసము, హవిష్యము, క్షీర యష్టికము, దధ్యోదనము, హవిస్సు, అపూపములు, మాంసము, చిన్నము ఇవ్వవలెను. వారిని యథాశక్తిగా, యథాలాభముగా సత్కరించవలెను. ఈ గ్రహములను ఉద్దేశించి క్రమముగా ఈయదగిన దక్షిణలు-ధేనువు, శంఖము, ఎద్దు, సువర్ణము, వస్త్రము, అశ్వము, కపిల ధేనువు, మేక. ఏ గ్రహము ఎవనికి దుష్ట స్థానాదుల నుండుటచే అపకారిగా నుండునో అతడు ఆ గ్రహమును పూజించవలెను, ‘మిమ్ములను ఎవరు పూజింతురో వారిని మీరు పూజించవలెను ‘రక్షించవలెను’ అని బ్రహ్మ ఈ గ్రహములకు వరములు ఇచ్చెను. రాజుల ఉన్నతి పతనము కూడ గ్రహాధీనమైనది. జగత్తు యొక్క స్థితిలయములు గూడ వీటిపై ఆధారపడి ఉన్నవి. అందుచే గ్రహములు చాల పూజింపదగినవి. (164)