96 - శ్రీ మద్భాగవతానుక్రమణీ నిరూపణమ్

బ్రహ్మ పలికెను :-

ఓ మరీచీ ! వేదవ్యాస మహర్షిచే చేయబడి బ్రహ్మసమ్మితమగు శ్రీమద్భాగవత మహాపురాణమును చెప్పెదను వినుము. శ్రీ మద్భాగవతము పదునెనిమిది వేల శ్లోకములు కలది. సకల పాప నాశకము. కల్ప వృక్షము వంటిది. ద్వాదశ స్కంధములు కలది. భగవంతుడే విశ్వరూపముగా చెప్పబడినది. ప్రథమ స్కంధమున సూత మహాముని ఇతర ఋషుల సమాగమమున పవిత్రమగు వ్యాస చరితము, పాండవ చరితము పరీక్షిచ్చరితము చెప్పబడినది. ఇక ద్వితీయ స్కంధమున పరీక్షిచ్ఛుక సంవాదమున సృష్టి ద్వయ నిరూపణము, బ్రహ్మ నారద సంవాదమున దేవతా చరితామృతము, పురాణ లక్షణము, సృష్టికారణ సంభవము చెప్పబడినది. తృతీయ స్కంధమున విదుర చరిత్రము, విదురునకు మైత్రేయ సమాగమము, పరమాత్మయగు బ్రహ్మసృష్టి ప్రకరణము కాపిల సాంఖ్య యోగము చెప్పబడినది. నాలుగవ స్కంధమున సతీ చరితము, ధ్రువ చరితము, పృథుచరితము, ప్రాచీన బర్హిష చరిత్రము చెప్పబడినది. అయిదవ స్కంధమున ప్రియవ్రత చరితము, తద్వంశ చరితము, బ్రహ్మండాంతర్గ లోకవర్ణనము, నరకస్థితి చెప్పబడినది. ఆరవ స్కంధము ఆజామిల చరితము దక్ష సృష్టి నిరూపణము, వృత్రాసుర చరితము, మరుత్తుల జన్మ, చెప్పబడినది. సప్తమ స్కంధమున పవిత్రమగు ప్రహ్లాద చరిత్రము, వర్ణాశ్రమ నిరూపణము, చెప్పబడినవి. అష్టమ స్కంధమున గజేస్త్ర మోక్షోపాఖ్యానము, మన్వన్తర నిరూపణమున సముద్ర మథనము, బలివైభవము, బంధకము మత్స్యావతార చరితము చెప్పబడినది. నవమ స్కంధమున సూర్యవంశ చరిత్ర, చంద్ర వంశ నిరూపణము వంశాను చరితమున చెప్పబడినది. దశమ స్కంధమున కృష్ణ బాల చరితము కౌమారమున వ్రేపల్లెలో నుండుట, కైశోరములో మధురలో నుండుట, యావనమున ద్వారకా నివాసము, యుద్ధమున భూ భార హరణము చెప్పబడినది. ఏకాదశ స్కంధమున వసుదేవ నారద సంవాదము, దత్తాత్రేయ యదు సంవాదము, శ్రీ కృష్ణోద్ధవ సమాగము, యాదవాన్తము చెప్పబడినది. ద్వాదశ స్కంధమున భవిష్య కలి నిర్దేశము, పరీక్షిన్మోక్షము, వేద శాఖా ప్రణయనము, మార్కండేయ తపస్సు, సౌర విభూతి, సాత్వతీ వీభూతి, పురాణ సంఖ్యాకథనము చెప్పబడినది. ఇట్లు శ్రీ మద్బాగవతమును చెప్పితిని. చెప్పువానికి, ఉపదేశించు వానికి, వినువానికి, ఆమోదించువానికి, సహాయము చేయువానికి కూడా భక్తి భుక్తి ముక్తిని కలిగించును. భాద్రపద పూర్ణిమనాడు హేమ సింహాసన సమన్వితముగా భాగవతుడగు బ్రాహ్మణునకు దానము చేయవలయును. వస్త్ర హోమాదులచే పూజించి భగవద్భక్తిని కోరువాడు ఈ భాగవతాను క్రమణిని చెప్పిననూ వినిననూ భాగవత పురాణ శ్రవణ ఫలమును పొందును.

ఇది శ్రీ బృహన్నారదీయ మహాపురాణమున పూర్వభాగమున బృహదుపాఖ్యానమున చతుర్ధపాదమున శ్రీమద్భాగవతాను క్రమణీ నిరూపణమను తొంబది యారవ అధ్యాయము.