90. ఆదిత్యవార కల్పమున హృదయవార విధి వర్ణనము

 తా॥ బ్రహ్మ దేవుడిట్లునుడివెను. “సూర్య సంక్రమణ మాదిత్య వారమునందయ్యెనేని అది సూర్య భగవానునకు ప్రియమైన ‘హృదయవార'మని చెప్పదగును. నక్త వ్రతముతో సూర్యదేవుని భక్తితో పూజించి, సూర్య మందిరమునకేగి యచట ఆ దేవున కభిముఖముగా. నూట యెనిమిది పర్యాయములాదిత్య హృదయమును పారాయణము చేయవలయును. లేక సూర్యాస్తమయమగు వఱకు మనస్సునందు సూర్యదేవుని ధ్యానింపుచుండవలెను. గృహమున కేతెంచి యథాశక్తిగ బ్రాహ్మణులకు భోజన సంతరణము చేయవలెను. ఆ పిదప మౌన వ్రతుడై తాను సూర్య ప్రసాద రూపమగు పాయసము భుజించి నేల పై పరుండవలెను- భక్తి శ్రద్దలతో నిట్టిదినమున సూర్యునారాధించువాడు సకల వాంఛితార్థములనాదేవునియనుగ్రహమున పొందగలుగును. మహాత్ముడగు సూర్యదేవుని ప్రావృషేణ్య (ఆర్ధపురుగుల) ప్రభ' వంటి తేజస్సుతోను, అతని కీర్తివంటి కీర్తితోను అతడు ప్రకాశించును.

శ్రీ భవిష్య మహా పురాణమునందలి బ్రహ్మపర్వమున ఆదిత్య వార కల్పమునందు 'హృదయవార విధి వర్ణన'మను తొంబదియవ అధ్యాయము సమాప్తము.