85. ఆదిత్యవార కల్పమున కామద విధి వర్ణనము

తా॥  బ్రహ్మదేవుడిట్లనెను. “మార్గశిర శుక్లపక్ష షష్ఠీతిథినాడు వచ్చు ఆదివారము 'కామద వారమని చెప్పబడును. ఇది సూర్యదేవున కెప్పుడును ఇష్టమైనది. భక్తి శ్రద్దా సమన్వితుడై ఆ దినమున భాస్కరునారాధించువాడు సర్వపాపముల నుండి ముక్తుడై సూర్యుని పొందును. ఎట్టి చందనముతోఁగలిపిన గన్నేరుపూలు, అగ్నిలో నేతిని యాహుతి చేయగా వచ్చు ధూపము, సూర్యపూజలో వినియోగింపవలెను. పరిమళము గల వేడి పులగమును నైవేద్యము పెట్టవలెను. ఉపవాసవ్రతము లేక నక్త విధితో సూర్యపూజ చేయవలెను. లోకములకు వెలుగును ప్రసాదించు భాస్కర దేవుడిట్లు పూజింపబడి సర్వకామములనిచ్చును. అందుచేనిది కామదమని చెప్పబడినది. పుత్రకాములకు పుత్రులను, ధనమును కోరువారికి ధనమును, విద్యార్థులకు శుభప్రదమైన విద్యను, రోగుల కారోగ్యము నిచ్చును. కామద వారమునాడు పూజలందించిన సూర్యదేవుడు ఇంకను వివిధములైన కోరికలన్నింటిని దీర్చును. అందుచే ఆనాటి సూర్యభగవానుడు కామదుడని చెప్పబడినాడు. వంశభూషణుడైన భక్తుడు ఆదినమున సూర్యభగవానునకు నేతి భక్ష్యములు సమర్పించేనేవి ఇంద్రతేజము వంటి తేజము గలవాడై అతడు సూర్యస్థానమునకుఁబోవును.

శ్రీ భవిష్య పురాణమునందలి బ్రహ్మపర్వమున ఆదిత్యవార కల్పమునందు కామదవిధి వర్ణనమను ఎనుబది యైదవ అధ్యాయము సమాప్తము.