87. ఆదిత్య వార కల్పమునందు జయంత విధి వర్ణనము

తా॥ దక్షిణాయనమునందలి ఆదిత్యవారము జయవారము ఉత్తరాయణమునందలి ఆదిత్యవారము జయంతవారమని యెఱుంగవలెను. ఆదినమున సూర్యదేవుని పూజింపవలెను. అటులపూజించిన వేయిరెట్లు ఫలము కలుగును. ఆనాడాచరింపబడు స్నానదానాదీకర్మలకు సూర్యభగవానుడట్టి ఫలమిచ్చును. నేతితోను, పాలతోను, చెఱకు రసముతోడను దేవదేవునకు స్నానము చేయింపవలెను. కుంకుమ విలేపనము ప్రశస్తమైనది. సూర్యునకు ప్రియమైనది. ధూపమునకు గుగ్గులు, నైవేద్యమునకు లడువములునుపయోగింపవలేనని చెప్పబడినది. ఇట్లు పూజించిన పిదప నువ్వులతో హోమము చేయవలెను. హోమానంతరము, లడ్డువములు, నువ్వులతో చేయబడు చక్కిలములతో బ్రాహ్మణ భోజనము సాగింపవలెను. ఇట్లు సమంత్రకముగ సూర్యారాధన చేయువానికి ఆ దేవదేవుడు వేయిరెట్లు ఫలమునిచ్చును. ఆ దినమున చేయబడు స్నానదానజపాదులు, ఉపవాస దీక్ష మున్నగువానికి ప్రీతుడై సూర్యదేవుడట్టి ఫలితము నొసంగును

శ్రీ భవిష్య మహాపురాణము నందలి బ్రహ్మపర్వమున, ఆదిత్యవార కల్పమునందు జయంత విధి వర్ణనమను ఎనుబది యేడవ అధ్యాయము సమాప్తము.