54. రథ సప్తమి కల్పమున సూర్యమహిమా వర్ణనము

 తా॥ రుద్రుడిట్లనెను. " అహో! మీరు చెప్పిన ఈ సూర్యుని మాహాత్మ్యమద్బుతము కదా! దీనినింకను చెప్పుడు”. బ్రహ్మదేవుడిట్లనెను. “సచరాచరమగు త్రైలోక్యమంతటికిని సూర్యుడే మూలము. దేవతలు, రాక్షసులు, మానవులతో కూడిన జగత్తంతయును సూర్యుని నుండియే కలుగుచున్నది. రుద్రుడు, ఇంద్రుడు, ఉపేంద్రుడు, చంద్రుడు, బ్రహ్మ, విష్ణు, శివుడు మొదలగు మహా తేజస్వులలోను, బ్రహ్మణోత్తములలోను సార్వభౌకికమైన ఈతని తేజమే వ్యాప్తమైయున్నది. ఈతడు సర్వాత్ముడు, సర్వలోకములకునీశ్వరుడు, దేవతలకు దేవత, ప్రజాపతి. ముల్లోకములకు మూలమైనవాడు. అందఱికిని పరమదైవతము. అగ్నియందు వ్రేల్చబడిన యాహుతులు చక్కగా ఆదిత్యుని చేరును. ఆదిత్యుని నుండి వర్షము కలుగును. వర్షము వలన అన్నము కలుగును. దానినుండి ప్రాణి సృష్టి జరుగును. సూర్యభగవానుని నుండియే సర్వము పుట్టును. తిరిగి అతనియందే లీనమగును. లోకములందలి సదసత్పదార్థములన్నియు పూర్వమతని నుండియే వెలువడినవి. ధ్యానము చేయువారికతడే ధ్యానస్థానము. మోక్షార్హులకితడే మోక్షము. మానవులు (ప్రాణులు) ఇతనియందే నిర్వాణము పొంది మఱలనితనీ నుండియే జన్మించుచుందురు. క్షణములు, ముహూర్తములు, దినములు, రాత్రులు, పక్షములు, మాసములు సంవత్సరములు, ఋతువులు, యుగములు. ఎల్లప్పుడు సూర్యునివలననే కలుగుచున్నవి. ఈయనవలన కాక కాలమునకు గణనము లేదు. కేవల కాలమునకు నియమమేలేదు. అందువలన అగ్నిలేదు. హవనము లేదు. ఋతువిభాగము లేనిదే పుష్పము ఎక్కడ? అది మూలముగాగల ఫలము ఎక్కడ? సస్యముల ఉత్పత్తి ఎక్కడిది? తృణాదులు, ఓషధులును ఎక్కడివి?

తా॥ జగత్తునకు వేడి వెలుగులనిచ్చువాడు, క్షార జలాదులహరించి వృష్టినిచ్చువాడైన సూర్యభగవానుడు లేనిచో ఆకాశమున, భూలోకమున గల ప్రాణుల వ్యవహారములన్నియు హుళక్కియగును. వర్షములేనిదే సూర్యుడు తపింపడు, ప్రకాశింపడు, ఆహారమీయడు, వికృతమగును. నీటిచేతనే అతడు దీపించుచుండును. సూర్యభగవానుడు వసంత ఋతువున కపిలవర్ణము, గ్రీష్మమున స్వర్ణవర్ణము, వర్షములయందు తెలుపువన్నె, శరత్కాలమున తెలుపుమించిన పచ్చవన్నె. హేమంతర్తువున రాగివన్నె, శిశిరమున ఎటువు వన్నె కలిగి ప్రకాశించుచుండును. ఇవి ఆయా ఋతువులందలి సూర్యవర్ణములు. ఇక వర్ణఫలమును వినుము. సూర్యబింబము నలుపువారినచో జగత్తునకు భయము కలుగును. రాగివన్నెకలిగెనేని సేనాపతికి వినాశము, పసుపువారిన రాజపుత్రున కరిష్టము తెలుపువన్నెలో ప్రకాశించిన పురోహితునకపాయము కలుగును. చిత్రవర్ణము లేక ధూమ్ర వర్ణములోనుండినచో దొంగల భయము శస్త్రభయములేర్పడును. ఈవర్ణములేర్పడిన వెంటనే వర్షము పడకుండిననే ఇట్టి ఫలములు కలుగును.

శతార్థ సాహస్ర సంహితయగు శ్రీ భవిష్యపురాణమునందలి బ్రహ్మపర్వమున రథసప్తమికల్పమున సూర్యమహిమా వర్ణనమను ఏబదినాల్గవ అధ్యాయము సమాప్తము.