అధ్యాయము - 84

విప్రులారా! ఉత్తర దేశము లయు, దక్షిణ దేశము లయు పర్వతము లందు నివసించు వారి వివరములను చెప్పు చున్నాను. చెదరని మనస్సులతో వినుడు.

శ్వేత పర్వతమునకు దక్షిణముగా, నీలమునకు ఉత్తరముగా, వాయవ్య దిశలో రమ్యకమను దేశము కలదు. అందు బుద్ధి విశేషము కలవారు, స్వచ్ఛ జీవనము కలవారు, ముసలి తనమును దుర్వాసన లేనివారు అయిన జనులు ఉందురు.

అందును ఒక పెద్ద రావి చెట్టు ‘రోహితము’ అనునది కలదు. దాని పండు వలనను, దాని రసమును త్రావుట వలనను అందలి మనుజు లందరు దేవ రూపులై పది వేల సంవత్సరములు ఆయువు కల వారగుదురు.

శ్వేత పర్వతమునకు ఉత్తరముగా, త్రిశృంగమునకు దక్షిణముగా హిరణ్మయము అను దేశము కలదు. అచట హైరణ్వతి అనునది కలదు. ఆ దేశమున బలవంతులు, కామ రూపులు అగు యక్షులు నివసింతురు.

అందలి జనులు పదు నొకండు వేల యేండ్లు జీవింతురు. మరియు వందల కొలదిగా ఇతరులు పదునైదు వేల యేండ్లు బ్రదుకుదురు.

ఆ దేశమున చిన్నవియగు గజ నిమ్మ వృక్షము లుండును. ఆ పండ్లను తినుచు అచటి మానవులు జీవింతురు.

అట్లే త్రిశృంగ పర్వతమును మణి కాంచనము, రత్న శిఖరము అనువాని వరుసలో దాని ఉత్తర శృంగము మొదలుకొని దక్షిణ సముద్రము తుది వరకు ఉన్నవి ఉత్తర కురు భూములు. అందలి జనులకు వస్త్రములు, ఆభరణములును చెట్టులందే కలుగును. అవి పాలను, రసములను ఇచ్చు వృక్షములు. అది యంతయు మణులు నిండిన భూమి. ఇసుక సువర్ణ మయము. అందు స్వర్గము నుండి జారిన మనుష్యులు పదుమూడు వేల యేండ్ల ఆయువు కలవారు నివసింతురు.

ఆ ద్వీపమునకు పడమరగా దేవ లోకము నుండి నాలుగు వేల యోజనములు దాటిన పిమ్మట చంద్ర ద్వీపము కలదు. వేయి ఆమడల వైశాల్యము కలది. దాని మధ్య చంద్రకాంత సూర్య కాంతములను గొప్ప పర్వతములు కలవు. వాని మధ్య చంద్రావతి అను మహా నది పెక్కు పండ్ల చెట్లతో పెక్కు నదులతో కూడినది కలదు. దీనినే కురు దేశము అందురు.

దాని ఉత్తర పార్శ్వమున సముద్రపు అలల మాలలతో గొప్పదియు, దేవ లోకము నుండి అయిదు వేల యోజనముల దూరమున నున్నదియు అగు సూర్య ద్వీపము వేయి ఆమడల వైశాల్యముతో కలదు. దాని మధ్య నూరు యోజనముల విస్తీర్ణము, ఎత్తుగల గొప్ప పర్వతమున్నది. అది సూర్య దేవుని నివాస భూమి. అందు సూర్యుడు దైవముగా గలవారు, ఆ వన్నె కలవారు పదివేల సంవత్సరముల ఆయువు కలవారు అగు జను లుందురు.

ఆ ద్వీపమునకు పడమరగా నాలుగు వేల యోజనములు దాటి పదివేల ఆమడల వైశాల్యము గల రుద్రాకరము అను ద్వీపము కలదు. అందు వాయు దేవుని భద్రాసనము పెక్కు రత్నములతో విరాజిల్లునది కలదు. అందు వాయు దేవుడు రూపము తాల్చి నివసించును. బంగారు వన్నె కల అచటి ప్రజలు అయిదు వేల ఏండ్ల ఆయువు కలవారు.