వరాహ మహా పురాణము
అధ్యాయము - 80
ఇటుపై దక్షిణ దిక్కున నెలకొన్న పర్వతముల మైదానములను గూర్చి చెప్పెదను. శిశిర పతంగముల నడుమ తెల్లని భూమి కలదు. అందు తీగలు చెట్లు కానరావు.
ఇక్షుక్షేపమను శిఖరమున చక్కని చెట్లతో ఒప్పారునదియు, పక్షుల మూకలు నివసించు నదియునగు అందమైన ఉదుంబర వనము కలదు. (ఉదుంబరము = మేడిచెట్టు)
పెద్ద తాబేళ్ల వంటి పండ్లతో ఆ వన మంతయు విరుగ బూచి నట్లుండును. దేవ యోనులు ఎనిమిది జాతుల వారు ఎల్లవేళల ఆ వనము నాశ్రయించి యుందురు.
అచట ప్రసన్నములు రుచి కలవి అగు జలములు గల నదులు ఎక్కవ నీరు కలవియై ప్రవహించు చుండును. అచట పూజ్యుడగు కర్దమ ప్రజాపతి ఆశ్రమము కలదు. పెక్కండ్రు ముని జనులతో నిండిన ఆ ఆశ్రమము నూరు యోజనముల వైశాల్యము కలది. మరియు అచట మండలా కారము గల వన మొకటి కలదు.
అట్లే తామ్రాభము పతంగము అను పర్వతముల నడుమ నూరు యోజనముల వెడల్పు, దానికి రెట్టింపు పొడవు కలదియు, బాల సూర్యుని వంటివి, అన్ని వైపుల దట్టముగా నున్నవి యగు నూరు రేకుల పద్మములతో ఒప్పారెడు గొప్ప సరస్సు కలదు. దాని దగ్గర పెక్కండ్రు సిద్ధులు గంధర్వులు నివసించు చుందురు. దాని నడుమ ఒక మహా శిఖరము నూరు యోజనముల పొడవు, ముప్పది యోజనముల విస్తీర్ణము కలది కలదు. దానిపై రత్నమయములగు తోరణములు గల పెద్ద బాట ఉన్నది.
దాని యందు విద్యాధర పురము పెద్దది కలదు. అందు పులోముడను విద్యాధర రాజు నూరువేల పరివారముతో నుండును.
అట్లే విశాఖ, శ్వేతము అను కొండల నడుమ ఒక సరస్సు కలదు. దాని తూర్పు ఒడ్డున పెద్ద మామిడి తోట కలదు. బంగారు వన్నెయు, మంచి వాసనయు, పెద్ద కుండలంతటి ప్రమాణమును గల పండ్లతో అది నిండి యుండును. దేవతలు, గంధర్వులు మొదలగు వారు అందు నివసింతురు.
సుమూలము, వసుధారము అను కొండల నడుమ ప్రదేశము ముప్పది యోజనముల వెడల్పు, ఏబది యోజనముల పొడవు కలది. అందు బిల్వస్థలి యను వనము కలదు. దాని ఫలము పవడముల వన్నెతో నుండును. అవి రాలి పడుచుండగా అచటి మట్టి అంతయు తడితడిగా అగుచుండును. ఆ తావునందు ఆ మారేడు పండ్లను తిను సుగుహ్యకాదులు నివసింతురు.
వసుధార రత్నధార గిరుల నడుమ ముప్పది యోజనముల వెడల్పు, నూరు యోజనముల పొడవు గల సువాసనతో నిండిన కింశుక వనము కలదు. (కింశుకము = మోదుగుచెట్టు.) అది ఎల్లవేళల పూచు చుండును. దాని సువాసన నూరు యోజనముల వరకు వ్యాపించును. అందు సిద్ధులు నివసింతురు. మంచి నీరందుండును. నెల నెలకు సూర్య ప్రజాపతి అక్కడ దిగు చుండును. కాలమునకు జనకుడగు ఆతనిని దేవతలు మొదలగు వారు నమస్కరించు చుందురు.
పంచ కూటము కైలాసము అనుకొండల నడుమ వేయి యోజనముల పొడవు నూరు యోజనముల వెడల్పు గలదియు, హంసలతో తెల్లనైనదియు, నీచ మృగములు చొర రానిదియు స్వర్గమునకు మెట్టు వంటిదియునగు భూమండలము కలదు.
ఇక పడమటి దిక్కు నందలి పర్వత ప్రాంతములను చెప్పెదను.
సుపార్శ్వము, శిఖి అను కొండల నడుమ నూరు యోజనముల పాషాణమయము, ఎల్లప్పుడు కాలుచుండు నట్టిది, తాక రానిది అగు భూభాగము కలదు. దాని నడుమ ముప్పది యోజనముల వైశాల్యము గల మండలము కలదు. అది అగ్ని స్థానము. అచట నన్నింటిని క్షయము చేయు సంవర్తకుడను అగ్ని దేవుడు మండు చుండును.
కుముదము, అంజనము అను దొడ్డ పర్వతముల నడుమ నూరు యోజనముల విస్తీర్ణము గల మాతులుంగ వనము కలదు. (మాతులుంగము = మాదీఫలము) ఎల్ల జంతువులకును అది చొరశక్యము కానిది. పసుపు పచ్చని పండ్లతో నిండి ఆ తావు విరాజిల్లు చుండును. అందు సిద్ధులకు నెలవగు పుణ్యమగు సరస్సు కలదు. ఆ వనము బృహ స్పతిది.
మరియు పింజర గౌరగిరుల మధ్య ఒక జల ప్రదేశము కలదు. పెక్కు వందల ఆమడల పొడవైనది. పెద్దపెద్ద తుమ్మెదలు రొద చేసెడు కలువలతో ఒప్పారు చుండును. అది పరమేశ్వరుడగు విష్ణువు స్థానము.
అట్లే శుక్లము పాండురము అను పెద్ద కొండల మధ్య ముప్పది యోజముల వెడల్పు, తొంబది యోజనముల పొడవు కల ఒక రాతి ప్రదేశము చెట్లు లేనిది కలదు. అందొక చోట బురద లేని దిగుడు బావి, కొన్ని చెట్లు కలది యున్నది. దాని సమీపమున పెక్కు జాతులకు సంబంధించిన మెట్ట తామరల తీగ పద్మములతో అలరారు చుండును. దాని నడుమ అయిదు యోజనముల వైశాల్యము గల పెద్ద రావి చెట్టు కలదు. అందు ఉమాపతి, నీలవర్ణపు వస్త్రము తాల్చిన వాడు అగు చంద్రశేఖరుడు యక్షాదులు స్తుతించు చుండగా నివసించును.
సహస్ర శిఖరము, కుముదము అనుకొండల నడుమ ఏబది ఆమడల పొడవు, ఇరువది ఆమడల వెడల్పు గల ఇక్షుక్షేపమను ఎత్తైన శిఖరము కలదు. పెక్కు విధములైన పక్షు లందుండును. పెక్కు తీరుల చెట్ల ఫలములు తీయని రసములను జాలువార్చు చుండును. అచట ఇంద్రుని ఆశ్రమము దివ్య భావములతో కూడినది కలదు.
మరియు, శంఖకూటము, ఋషభము అను గిరుల మధ్య ‘పురుషస్థలి’ అను తావు కలదు. గొప్ప గుణములు అనేక యోజనములు విస్తారము కలది. మారేడు పండ్లంతటి కంకోలక ఫలములు మంచి వాసన కలవి అందుండును. పున్నాగ పుష్పముల రసముతో ఉన్మత్తములగు మహా సర్పము లందుండును.
అట్లే కపింజలము నాగము అను కొండల నడుమ, రెండు వందల యోజముల పొడవు వెడల్పులు గల ‘శతయోజన స్థలి’ కలదు. అందు పెక్కు తోటలు, ద్రాక్ష, ఖర్జూరములతో అలరారి యున్నవి. పెక్కుచెట్లు, తీగలు, సరస్సులు ఆతావున నున్నవి.
అట్లే పుష్కరము, మహా మేఘము అను పర్వతముల నడుమ అరువది ఆమడల వెడల్పు, నూరామడల పొడవు గల ‘పాణితల’ మను పెద్ద మైదానము కలదు. అందు చెట్లు చేమలు ఉండవు. దాని ప్రక్క నాలుగు పెద్ద వనములు, పెక్కు యోజనముల విస్తృతి గల సరస్సులు కలవు. పది, అయిదు, ఎనిమిది, ముప్పది, ఇరువది యోజనముల ప్రమాణము కల భూములు, మైదానములు కలవు. అందు కొన్ని మహా ఘోరములగు గుహలును ఉన్నవి.