అధ్యాయము - 61

అగస్త్యుడు:

అగస్త్యుడు:

మహారాజా! నీకిపుడు కామ వ్రతమును చెప్పెదను. వినుము. దీనితో మనస్సులో తలచిన కామములు కూడ నెరవేరును.

పుష్య మాస శుక్లపక్షము చవితి నాడు భోజనము చేసిన వాడై షష్ఠి మొదలుకొని ఒక్క సంవత్సరము కాలము ఫలములే ఆహరాముగా ఈ వ్రతమును చేయ వలయును.

షష్ఠినాడు ధీశాలి మొదటగా వాక్కులను నియమించు కొని (మౌనవ్రతము పాటించి) ఫలాహారమును తీసికొన వలయును. అటు పై బ్రాహ్మణులతో పాటు శుద్ధమైన ఆహారమును తీసికొను చుండ వలయును. లేదా కేవలము పండ్లతోనే ఆ ఒక్కరోజు గడపి సప్తమి నాడు భోజనము చేయ వలయును.

అగ్నికార్య మాచరించి ఒక ఏడు కుమార స్వామి రూపమున అతని పేరుతో శ్రీమహా విష్ణువును పూజించి ఈ వ్రతమును చేయ వలయును.

ఆరు మోముల వాడా! కార్తికా! గుహా! సేనానీ! కృత్తికల కుమారుడా! కుమారుడా! స్కందా! అని యిట్లు గుహుని పేరులతో విష్ణువును పూజింప వలయును.

వ్రతము ముగిసిన పిదప బ్రాహ్మణులకు భోజనము పెట్ట వలయును. బంగారు కుమారస్వామి ప్రతిమను బ్రాహ్మణునకు దాన మొసగ వలయును.

దేవా! కుమారస్వామీ! విప్ర రూపమున వచ్చినవాడా! నీ దయ వలన నా కోరిక లన్నియు నెరవేరు గాక! భక్తితో ఒసగిన దీనిని గ్రహింపుము. ఆలసింపకుము.

అను ఈ మంత్రముతో బ్రాహ్మణునకు రెండు వస్త్రములతో పాటు ఒసగ వలయును. దాని వలన ఆతనికి ఈ జన్మమున కోరిక లన్నియు సిద్ధించును.

పుత్రులు లేనివాడు పుత్రులను, ధనము లేనివాడు ధనమును, రాజ్యము పోయిన వాడు రాజ్యమును పొందును. ఇందు విచారము చేయ నక్కర లేదు.

మునుపు ఋతుపర్ణుని దేశమున వ్రతచర్యతో నివసించి నపుడు నలుడీ వ్రతము నాచరించెను.

అట్లే రాజ్యము నుండి భ్రష్టులైన పెక్కండ్రు రాజ సత్తములు, మరల రాజ్యమును పొందుటకై పురాణ ప్రసిద్దమగు ఈ వ్రతము నాచరించిరి.