అధ్యాయము - 54

భద్రాశ్యుడు:

భద్రాశ్యుడు:

బ్రాహ్మణోత్తమా! విజ్ఞానము ఉత్పత్తిని కోరు వానికి ఆరాధ్యుడెవరు? (ఎవని నారాధింప వలయును) ఆతని నారాధించు విధ మెట్టిది? దీనిని నాకు ఉపదేశింపుము.

అగస్త్యుడు:

అగస్త్యుడు:

సర్వ దేవతలకును, సర్వ కాలముల యందు ఆరాధింప దగిన వాడు ప్రభువగు విష్ణువే. అతడు వరదు డగుటకు ఉపాయమును చెప్పెదను.

సర్వ దేవతలకు, మునులకు, నరులకు పర దైవము నారాయణుడే. ఇది రహస్యము. అతనికి ప్రణమిల్లిన వాడు ఎన్నటికిని చెడడు.

ఇది వినవచ్చు చున్నది. పూర్వము మహాత్ముడగు నారదుడు తుష్టి నిచ్చెడు విష్ణు వ్రతమును అప్సరసలకు చెప్పెనట.

పూర్వ కల్పమున ఒకప్పుడు నారదుడు స్నానము కొరకు మానస సరస్సున కరిగెను. అందు అప్సరసల గణమును చూచెను.

ఆ వరాంగనలు విలాసినులు అప్సరసలు జడలే కిరీటముగా గలవాడు, ఎముకలు తోలు మాత్రమే మిగిలిన వాడు, గొడుగు, దండము, పుఱ్ఱ అను వానిని తాల్చిన వాడు, దేవతలను రక్కసులను, నరులను చూడ గోరువాడు, కలహ ప్రియుడు, వేద నాదము కలవాడు, తపస్సుతో కూడిన వాడునగు నాతనిని చూచి ఇట్లు అడిగిరి.

అప్సరసలు:

అప్సరసలు:

పూజ్యుడా! బ్రహ్మ కుమారా! మేము భర్తను కోరుచున్న వారము. మాకు నారాయణుడు భర్త యెట్లగునో దానిని ఉపదేశింపుము.

నారదుడు:

నారదుడు:

ప్రశ్నము ఎప్పుడును ప్రణామ పూర్వకముగా నుండ వలయును. అదియే శుభము నొసగును. మీరు వయసు పొగరున నన్ను ఆ విధముగా అడుగ రైతిరి.

అయినను మీరు దేవ దేవుడగు విష్ణువు నామమును కొనియాడితిరి. మాకు హరి మగడెట్లగు నంటిరి. అతని నామమును పలుకుట చేతనే సర్వము సిద్దించినది. సంశయము లేదు.

హరి స్వయముగా వరదుడగు వ్రతమును, భర్త యగుటను ప్రసాదించు దానిని చెప్పెదను వినుడు.

నారదుడు:

నారదుడు:

వసంత ఋతువున చైత్ర మాసమున శుక్ల పక్షమున వచ్చు ద్వాదశి నాడు ఉపవాస ముండి విధి పూర్వకముగా రాత్రి యందు హరి నర్చింప వలయును.

తెల్లని వప్త్రము కప్పిన పాన్పును, పెక్కు చిత్రములు కల దానిని ఏర్పరచి అందు లక్ష్మితో కూడిన హరిని వెండితో చేసి నిలుప వలయును.

అ పాన్పు మీదుగా పూవులతో చక్కని మండపమును ఏర్పరుప వలయును. నృత్యములు, వాద్యములు, పాటలు మున్నగు వానితో అందు జాగరము చేయ వలయును.

‘ఓం నమో మనోభవాయ’ అని శిరస్సున, ‘నమః అనంగాయ’ అని నడుమును, ‘నమః కామాయ’ అని భుజములను, ‘నమః సుశాస్త్రాయ’ అని ఉదరమును, ‘నమో మన్మథాయ’ అని పాదములను, ‘నమో హరయే’ అని సర్వాంగములను, మల్లెలు, జాజులు మొదలగు పూవులతో చక్కగా పూజింప వలయును.

పిదప చక్కని నాలుగు చెఱకు గడలను దేవునకు నాలగు దిక్కు లందను నిలప వలయును.

ఇట్లొనర్చి మరునాడు తెల్లవారిన తరువాత, వేదము లందును, వేదాంగము లందను పండితుడును, బుద్ధి మంతుడును, ఏ అంగ వైకల్యము లేనివాడును అగు బ్రాహ్మణునకు దాన మీయ వలయును.

అట్లే బ్రాహ్మణులను పూజించి ఈ వ్రతమును సమాపనము చేయ వలయును. ఇట్లు చేసినచో మీకు తప్పక విష్ణువు భర్తయగను.

సుందరులారా! మీరు నాకు మ్రొక్కు నిడక గర్వముతో అడిగితిరి. ఈ అవమాన మునకు ఫలము మీకు తప్పక కలుగును.

సుందరులారా! ఈ సరస్సు నందే అష్టావక్రుడను మహాముని కలడు. అతనిని వెక్కిరించి మీరాతని శాపము పొందెదరు.

ఈ వ్రతము చేత దేవ దేవుని పతిగా పొందుదురు. కాని ఈ అవమానము వలన గోపాలుర చేత మీ అపహరణము కలుగును. పూర్వము కన్యలను హరించిన ఆ దేవుడు మీకు భర్త కాగలడు.

అగస్త్యుడు:

అగస్త్యుడు:

ఇట్లు పలికి ఆ దేవర్షి నారదుడు క్షణములో అట నుండి వెడలి పోయెను. వారును ఆ వ్రతము నాచరించిరి. హరి స్వయముగా వారి యెడల తుష్టు డాయెను.